Begin Again هو فيلم موسيقي درامي، كوميدي شوية… من بطولة: Keira Knightley, Mark Ruffalo, Adam Levine, Catherine Keener, Hailee Steinfeld, James Corden, CeeLo Green, Mos Def. قام بكتابه الفيلم واخراجه John Carney.
الــقــصــة
الفيلم بيحكي قصة (Dan) اللي بيقوم بدوره Mark Ruffalo وهو منتج موسيقي ومدير لشركة تسجيلات، قضي حياته في المهنة نظرا لحبه لها، وهو شخصية مغرمة بالموسيقي والاغاني وبيأمل في تطوير هذه الصناعة الرائعة. لكن بيفصل من عمله بالاضافة لفشله في حياته الشخصية مما يصيبه بالاحباط.
علي الجانب الاخر فنحن امام Gretta اللي بتقوم بدورها Keira Knightley كاتبة اغاني ومغنية (بس مش مشهورة يعني ) بس بتعرف تغني.. بتيجي نيويورك مع حبيبها المغني المشهور(Dave) لأن هي مصدر الهام لكل الاغاني بتاعته، لكن بيسيبها لأنه علي علاقة باحد المنتجين.
شاهد أيضاً: Interstellar | استعراض ومناقشة بالعربي
تشاء الظروف وبيتقابل (دان) مع (جريتتا) فبيعرض عليها انه يعمل لها البوم غنائي نظرا لإيمانه بموهبتها وبالفعل بيتم التحضير للألبوم على أن يتم تسجيله في الشوارع او أي مكان في نيويورك مع فرقة موسيقية مكونة من ناس موهبين في الموسيقي والعزف. وبتبدأ رحلتهم وجولتهم في شوارع نيويورك لتسجيل أغانيهم. وخلال الرحلة دي بتنشأ علاقة صداقة بين (دان) و (جريتتا ).
الـمـمـثـلـيـن وشـخـصـيـاتـهـم
Mark Ruffalo في دورDan. أدائه في الفيلم كان ممتاز واعجبت به جدا ودوره مختلف عن اي دور عمله قبل كده. زي ما قلت، شخصية مغرمة بالموسيقي وإحساسه عالي جدا. ظهر ده في تعبيرات وجهه اكثر من مرة. ايضا ايمانه بكل واحد عنده موهبة موسيقية، فهو واحد همه يعمل اي حاجه عشان يعمل البوم ماحصلش. فالاصرار كان دايما المحرك الاساسي لشخصيته عشان هو بيحب الموسيقي بس مش عشان اهداف انانية. مشاهد علاقته بمراته و بنته وتطوراتها مثّلها بشكل رائع يخليك تتعاطف معاه شوية. كان في شخصيته كوميديا خفيفة ومقبولة لحد ما.
شاهد أيضاً: John Wick | استعراض ومناقشة بالعربي
Keira Knightley في دور Gretta، اول مرة تعمل فيلم وتطلع فيه بتغني وبصراحة عجبتني بنسبة 100%. الممثلة دي مفيش دور بتعمله وبيطلع شبه التاني. وفي الدور ده ابدعت، ادائها الرومانسي كان كويس جدا لأن جسدت مشاعر الاخلاص والوفاء في الحب بإتقان ، ولحظات الحزن عملتها حلو.
بالنسبة للجانب الاهم في شخصيتها وهو الجانب الموسيقي فكان اكثر تفوقا في الاداء، دي كاتبة اغاني محترفة وتقدر من تجربة مرت بيها تكتب اغنية بسرعة تعبر عن كل مشاعرها فيها لأن الاغاني هي مصدر الالهام ليها. ادائها للمشاهد الغنائية حلو جدا وكان باين احساسها في كل مشهد.
Adam Levine في دور Dave، هو مغني فعلا وأول مرة يمثل في فيلم. الشخصية مكتوبة حلو و ادائه ليها كان مقبول بالنسبة ان اول مرة يمثل. التغييرات اللي بتحصل في الشخصية بيمثلها حلو. وهو شخصية انانية ومش صادقة في مشاعرها. وهو اظهر كل الحاجات دي وقدرت اتفاعل معاه.
Hailee Steinfeld في دور Violet ابنة (دان)، عملت الدور حلو ومش مفتعل خالص وقدرت اتعاطف مع الفراغ اللي في شخصيتها.
James Corden في دور Steve صديق جريت، Catherine Keener في دور زوجة (دان)، ودول ادوارهم صغيرة وعادية جداً. CeeLo Green دوره صغير برضو بس لطيف.
Mos Def في دور (سول) شريك (دان) في شركة التسجيلات. دوره صغير، 3 مشاهد بس عملهم وحش.. هو انت جاي علي واحد عمل 3 مشاهد وتعترض عليه؟ ايوه معجبنيش وكان سمج. يمكن لو ممثل زي David Cross كان عمله كان هيبقي شغال لأنه عمل دور زييه في فيلم Alvin and the Chipmunks.
شاهد أيضاً: Gone Girl | استعراض ومناقشة بالعربي
السـيناريو والاخراج
السيناريو كان مميز جدا ومكتوب بمهارة شديدة مش اي جمل حوارية وخلاص. كل مشهد كان مكتوب حلو. سيناريو مباشر مافيهوش تعقيدات خالص، يعيب فيه بس بعض الالفاظ الغير محبب نسمعها. لكن الفيلم بالقصة والسيناريو أضفوا روح جميلة جدا عليّا .. سكرييبت مختلف عن اي فيلم موسيقي شوفته، يبعث فيك الامل والحب.
الاخراج كان ممتاز برضه، اصلا اختيار الممثلين كان ممتاز وقدر المخرج يخرجّهم بصورة حلوة جدا. الشخصيات وعلاقتهم ببعضها ظهروا بشكل حلو. مشاهد (دان) مع زوجته ومشاهده مع بنته كانت قليلة بس خرجت بصورة متواضعة جدا ويمكن طلعت كده عشان ماتكونش مفتعلة..؟ يمكن . برع المخرج في اخراج المشاهد الغنائية قوي وكانت من احلي المشاهد لما تشوف الفرقة مع بعض او لما يكون في اغنية، كل ده خرج في صورة جديدة بالنسبة لي. قدر المخرج انه يقنعني ان الموسيقي مصدر الهام شديد جدا لو بتحبها.
الاحساس بالموسيقي ظهر بشكل حلو. استخدم المخرج الفلاش باك مرتين وكان ده مبرر. القصة في ناس ممكن تشوفها بتميل الي السطحية قليلا، لكن في رأيي الاحاسيس الجميلة والموسيقي الرائعة اعطت عمق لمعني الفيلم والاحداث. في تقديري نهاية الفيلم كانت رائعة لأتها مش متوقعة. دي نهاية مختلفة عن اي نهاية تقليدية للنوعية دي من الافلام.
إقرأ أيضاً: Left behind .. واحد من الافلام اللي اتعرضت في عام 2014 مش اكتر
حاجه مهمة جدا لازم اتكلم عنها: الاغاني والموسيقي
لعبوا دور اساسي في الفيلم، ايوه دور اساسي يعني كأنهم بيمثلوا الفيلم. مفيش اغنية في الفيلم الا وكان بيبقي ليها هدف يعني بتقول شئ او بتحكي موقف او بتظهر مشاعر ما. ودي حاجه انا شخصيا انبهرت بيها. يعني لو شلت الاغاني ، الفيلم باظ. حاجه تقريبا انا مشوفتهاش من ايام فيلم The Sound of Music .. يمكن تكون اتعملت في افلام تانية بس انا مشوفتش. كلمات الاغاني كانت حلوة، واتحداك: هتتفرج علي الفيلم وهتقول عاوز اسمع الاغاني بتاعته تاني. موسيقي وكلمات و ريمكسات تحفة.
الـتـقـيــم الـنـهـائـي
Begin Again هو فيلم صعب يتنسي، الاداء الجميل لفريق التمثيل والاغاني والموسيقي كل دي حاجات جعلت من الفيلم نابض بالحياة. عاوز تعرف عنوان المقال اسمه كده ليه ؟ اتفرج علي الفيلم.
انا هادّي الفيلم 10\9.
للتواصل مع الكاتب عبر فيسبوك: فادي ميشيل