بداية كده مش عارف ليه بتشائم من الأفلام اللي مخرجها هو مؤلفها مع ان دي حاجة المفروض انها تكون افضل لأن المخرج هيبقي حاسس بكل مشهد وعايشه من قبل مايتصور وده عكس اللي حصل تماما في فيلم الشموع السوداء … اقصد Before I go to sleep !!
Christine بتصحي من النوم جنب شخص ما مش عارفة هو مين وبتجري علي الحمام بتلاقي صور متعلقة علي الحيط ليها و للشخص ده بفستان فرح بما ياعني انه جوزها.
بيتضح ان Ben جوزها من 10 سنين، وبيحكلها انه حصلتلها حادثة من بعد ماتجوزوا اثرت علي المخ وخليتها تحتفظ بالذاكرة لحد ماتنام بس، وبعد ماتصحي تاني يوم مش هتفتكر أي حاجة حصلت من 10 سنين وطبعا بيضطر جوزها انه يحكلها هو مين وكل حاجة عن نفسه وعن حياتهم كل يوم بتصحي فيه من النوم!!
شاهد أيضاً: بالفيديو | Predestination | استعراض ومناقشة بالعربي
وفي يوم بتكتشف Christine انها بتتعالج مع دكتور نفساني ولكن في السر بسبب انه مش واثق في جوزها وبالتالي هي كمان مش هتبقي واثقة فيه وخصوصا انه كذب عليها لما فاهمها ان اللي حصلها ده من حادثة عربية وده اللي نفاه الدكتور بتاعها والحقيقة انها تعرضت للضرب الشديد علي دماغها والشرطة لقيتها جنب فندق وهي فاقدة الوعي وطبعا الشرطة موصلتش للجاني والقضية اتقفلت.
إقرأ أيضاً: Wetlands | الفيلم ده قصه ولا مناظر؟!
بتستمر احداث الفيلم بين صراع نفسي بين Christine وبين جوزها ودكتورها لمعرفة حقيقة اللي حصلها ومين اللي عمل معاها كده.
نيجي بقي للتمثيل:
علي فكرة التمثيل مكانش وحش بس روتيني لدرجة حسستني انهم كانوا محتاجين فلوس السبكي عشان يمثلوا الفيلم ده
Nicole Kidman أو Christine مثلت دور الزوجة المرتبكة الفاقدة للذاكرة حلو بس لازم تحاول انها تجدد شوية في انفعالتها اللي شبه بعض دي عشان بصراحة انا كنت عارف كل مشهد هتعمل ايه و هيكون رد فعلها ايه بالظيط.
شاهد أيضاً: بالفيديو | The Judge | استعراض ومناقشة بالعربي
Colin Firth أو Ben بصراحة هو شكله ممثل كويس بس انا للأسف مشوفتلوش أي فيلم تاني مع انه له رصيد من الافلام بس ولا واحد فيهم سمع واحساسي ان الفيلم ده كان هو فرصته بس من الواضح انه حظه وحش.
Mark Strong أو Dr. Nasch اللي حظه ميختلفش كتير عن Colin Firth له رصيد من الافلام الحلوة بس للأسف كلها يا دور ثالث يا رابع.
القصة لـ S.J.Watson اللي Before I go to sleep اول اعماله ونفسي اعرف هل هي نفس الفيلم بالظبط ولا فيها اختلاف،
التويستة اللي في اخر الفيلم حلوة بس مش مقنعة وبالذات في امريكا، ياعني لو في مصر هنمشيها
السيناريو والحوار والاخراج:
Rowan Joffe منك لله يا Joffe كلهم هيبوروا بسببك انت وانا كمان مش مسامحك في ثمن التذكرة.
إقرأ أيضاً: Honeymoon | حلقة مضروبة من X-Files
ليه كل المط ده، والله العظيم عرفنا ان Christine بتصحي كل يوم الصبح مش فاكرة حاجة وجوزها بيحكيلها وبيحكيلنا احنا كمان اللي حصلها، كان ممكن تدخل مشاهد فلاش باك عشان الملل بدل متخلي حد يقعد يحكي اللي حصل (مانا لو عايز اسمع كنت ممكن اجيب القصة واقراها واتخيل انا بقي) يا اخي اتعلم من عمك David Fincher في Gone Girl
نفسي اقول نقطتين للمخرج Rowan Joffe :
اولا:
يا استاذ Rowan يا مخرج يا عظيم، يا مؤلف يا بديع، فكرة الفيلم دي اتهرست 100 مرة في امريكا و 75 مرة في مصر و 50 مرة في الهند و 3 مرات في نيكاراجوا.
ثانيا:
عايز تعمل فيلم نهايته سعيدة، اقنعني بيها وبلاش نهايات افلام عماد حمدي وفاتن حمامة “ليت السعادة في الماااااال ولكن الساعدة في راحة الباااال” دي.
شاهد أيضاً: بالفيديو | Nightcrawler | استعراض ومناقشة بالعربي
من الاخر كده لو عايز تتفرج علي نفس الفكرة دي بس بأداء احسن من Before I go to sleep ممكن تتفرج علي 50 1st dates أو Memento احسن منه بمراحل (او حتي فيلم كريم عبد العزيز فاصل ونواصل)
تقيمي للفيلم 5/10 وده كرم مني والله عشان بس التمثيل مش اكتر
للتواصل مع الكاتب عبر فيسبوك: محمد عبد الخالق