مبدأيا الفيلم تم عرضه في أكتوبر 2012 وانا لسه شايفه الاسبوع ده فهتكلم عنه
الفيلم من بطولة: سامح حسين، أيتن عامر، لطفي لبيب، عايدة رياض، نور الكاديكيي، صفاء جلال، ليلي عزالعرب، والطفلة: ناريمان عمرو
تأليف: صلاح الجهيني
وإخراج: معتز التوني
لمشاهدة تريلر الفيلم:
* الــقــصــة :-
الفيلم تدور احداثه حول شخصية (نادر) (سامح حسين) المصاب بسوء الحظ الشديد منذ يوم ولادته، منحوس في عمله وفي كل حاجه بيعملها. واعتقاده في الابراج بيجعله يؤمن انه منحوس جدا.
علي الجانب الاخر نري شخصية (نور) (أيتن عامر) المراسلة الاخبارية بإحدي القنوات الفضائية وهي ايضا مصابة بسوء الحظ وبتحصلها مشاكل دايما في عملها وحياتها اليومية. تشاء الظروف وبيتقابلوا مع بعض وبتبدأ تحصل بينهم مواقف غريبة وغير متوقعة وكوميدية جدا بتغير حياتهم
فمن الواضح ان تيمة الفيلم هي: سوء الحظ والنحس، ودي فكرة سبق تقديمها في افلام كتير. ومش هنقدر ننكر ان الكوميديا اللي بتطلع من سوء الحظ بتبقي جميلة جدا، لكن الكاتب هنا استغل الفكرة دي وصاغها في شكل جديد وقدمها بطريقة جديدة في قصة مختلفة. عشان تعرفوا انا بقصد ايه لازم تشوفوا الفيلم.
إقرأ أيضاً: Fight Club | اول قاعده لنادى القتال هى ..
* الــمــمــثــلــيــن وشــخــصــيــاتــهــم:-
(1) سامح حسين في دور (نادر)
الفيلم ده هو أول بطولة مطلقة لسامح حسين. جاء بعدها (كلبي دليلي ) في 2013 و من بعده (جيران السعد) في 2014 (ملحوظة ان جيران السعد مشوفتوش). الفيلم ده في رأيي هو الافضل لسامح حسين من ناحية القصة وأداء سامح حسين
فبعد شخصيات كوميدية قدمها سامح حسين في الدراما مثل: رمزي، عبوده، فطين، الزناتي مجاهد
كل دي شخصيات كانت بتضحكنا بجد. لكن في (30 فبراير) قرر سامح حسين يغير من ادئه تماما، عمل شخصية كوميدية مختلفة تماما عن اعماله السابقة ومختلفة قليلا من حيث الشكل. جاء ادائه هادئ ومتزن جدا وقدم كوميديا راقية في سياق الاحداث وطريقة التمثيل، فشخصيته كوميدية ومستغلة حبتين. الابتسامة مفارقتنيش وانا بتفرج علي شخصية (نادر) واللي مكنتش كنت بحس شوية بالملل في فيلم (كلبي دليلي) نظرا للاداء المكرر
سامح حسين في 30 فبراير: أداء مختلف وجيد جدا
(2) أيتن عامر في دور (نور)
اللي شافوا الفيلم بعضهم انتقد اداء أيتن عامر وقالوا انها مش كوميديانة حلوة. في رأيي دورها اصلا مش كوميدي. هو كام موقف بتتعرضله دول اللي فيهم الكوميديا وكان ادائها فيهم عادي مش رخمة يعني.
دورها مختلف عن طبيعة الادوار اللي عملتها قبل الفيلم.هو انا محستهاش شوية في دور المراسلة بس ده يمكن لأنها في الفيلم حظها وحش؟؟! . بس نقدر نقول ان مكانش في ممثلة احسن منها ممكن تعمل الدور ده لأنه هيبقي عادي لكن بالنسبة لأيتن عامر الدور ده هيفيدها من حيث التجديد شوية في الاداء. هي معملتش الدور وحش ولا ابدعت فيه. اداء جيد في النهاية
(3) لطفي لبيب في دور (زكي) مدير الشركة اللي بيشتغل فيها (نادر)
دور صغير، وادائه الكوميدي المعروف، مفيش جديد يعني. وكان لطيف
(4) نور الكاديكي في دور (داليا) سكرتيرة مدير الشركة
دورها كان متوسط ، وجه جديد للسينما حلو وشغال. وادائها كان منطقي للشخصية دي
شاهد أيضاً: Big Hero 6 | استعراض ومناقشة بالعربي
(5) عايدة رياض في دور أم (نادر)
ادائها عادي ومفيش اي اضافة لأن الدور مكتوب ببساطه شديدة. مفيش غير جملة قالتها في اخر الفيلم و عملتها حلو
(6) الطفلة: ناريمان عمرو في دور (ملك)
بنت أخت (نادر) اللي بتقوم بدورها (صفاء جلال) اللي قامت بدورها صغير وعادي
البنت الصغيرة دي عملت دورها حلو جدا بكل براءة وطيبة جميلة. مكانتش مفتعلة ومحاولتش تقلد الكبار غير في جملة كده. اصبح دلوقتي المخرجين بيحاولوا يخلوا الصغيرين يمثلوا زي الكبار عشان يضّحكوا وده شئ وحش. لكن هنا دور (ملك) كان تلقائي جدا وحلو
الفيلم احتوي علي عدد كبير من ضيوف الشرف اللي اضفوا جو كوميدي شديد جدا، وهم:
مظهر أبوالنجا، إدوارد، محمد الصاوي، يوسف عيد، بيومي فؤاد ، علاء مرسي، معتز التوني( ايوه مخرج وعمل مشهد وكلنا بنستظرفه) وكمان : حسن عبد الفتاح،، احمد فتحي، ايمان السيد وممثل كوري او صيني مش عارف بس كان دوره حلو
* الـسـيـنـاريـو و الاخـراج:-
قصة وسيناريو الفيلم يعتبر بمستوي جيد خصوصا ان دي اول تجربة للمؤلف، فقدر يعمل سيناريو بسيط بيقدم هدفه مع كوميديا خفيفة ولطيفة من غير ابتذال. سياق الاحداث كان ماشي بشكل متوازن وكذلك المواقف الكوميدية اللي اغلب احداث الفيلم بتقوم عليها وقلل من الافيهات. وده شئ حلو انا شخصيا بحبه
كمان طريقة كتابة الشخصيات الاساسية كانت كويسة جدا، قدر المؤلف يخلي سامح حسين يقدم كوميديا جديدة. وقدم أيتن عامر في شكل مقبول بالنسبالي وقلل من الجانب الكوميدي لشخصيتها عشان متكونش مفتعلة
علي مستوي الاخراج: المخرج والممثل معتز التوني في رصيده الاخراجي 3 أعمال وهم:
1- سمير وشهير وبهير 2010
2- 30 فبراير 2012
3- مراتي وزوجتي 2014
شاهد أيضاً: The Wolf of Wall Street | استعراض ومناقشة بالعربي
فلو هنقارن بين الافلام في الاخراج: فالافلام من حيث الابداع الاخراجي فهم بنفس الترتيب المذكور
ابدع المخرج في (سمير وشهير وبهير ) انه يقدم صورة كوميدية شديدة في المواقف والشخصيات حتي المشاهد اللي من غير اي حوار.
الريتم قل شوية في( 30 فبراير) بس كان جيد والشخصيات طلعت بشكل جيد سواء ادوار اساسية او صغيرة او حتي ضيوف الشرف
بينما في (مراتي وزوجتي) مجهود معتز التوني كان مرتبك شوية، فيه مشاهد ابدع فيها واخري اخفق فيها
اذا ( 30 فبراير) بذل فيه المخرج مجهود عشان يطلع بالمستوي ده، ظهر في مشاهد ولقطات خدمت الفيلم اوي وكمان عشان يكون بمثابة تجديد لسامح حسين. التصوير كمان كان متقن جدا
الموسيقي كانت لطيفة وخدمت المشاهد الكوميدية
** في مشهد كده ممكن اعلق عليه انه جاء لكسب تعاطف البطلة وعشان يقودنا للنهاية المتوقعة للفيلم. بصراحة كان المشهد والحبكة مبررة من قبل ظهور البطلة اصلا. بس نقدر نقول ان المؤلف مكانش لاقي فكرة جديدة يحطها فقام بكتابة مشهد تكرر في افلام كتيير**
شاهد أيضاً: Guardians of the Galaxy Review | استعراض ومناقشة بالعربي
* الــقــيــيــم الــنــهــائــي:-
30 فبراير هو فيلم رسالته المتواضعة واضحة جدا: اللي بيجتهد بجد بينجح وبيوصل للي هو عاوزه. وان الحظ مش هو اللي بيحقق النجاح، ده لو كان في حظ اساسا.
الفيلم يعتبر لايت كوميدي، بيخليك تبتسم في مشاهد كتير وتضحك شوية. وهو تجديد لادء سامح حسين التمثيلي والكوميدي اللي كان اهم واحد بالنسبالي
التقييم: 10\8
أنصح بمشاهدته، هو فيلم للعائلة كلها
للتواصل مع الكاتب عبر فيسبوك: فادي ميشيل